Цената на фјучерсите за северноморската нафта Брент за испораки во август 2020 година на лондонската берза „ICE” се зголеми за 1,7 проценти и го достигна нивото од почетокот на март.

Со денешниот раст, цената на нафтата од Северното Море достигна цена од 43,02 долари за барел, покажуваат податоците на берзата.

Последен пат цената на оваа нафта беше повисока од 43 долари за барел на 6 март оваа година.

Суровата нафта од типот „WTI“ се тргуваше по цена од 40,22 долари за барел, што е за 1,7 проценти повеќе во однос на претходното затворање на берзата.

Министрите на земјите од „OPEC Plus” на онлајн состанокот на 6 јуни се согласија да го продолжат највисокото ниво на намалување на производството на нафта за уште еден месец, односно до крајот на јули. И покрај невидените ограничувања, Русија и Саудиска Арабија инсистираат сите членови на алијансата целосно да го почитуваат договорот.

Поради пандемијата на коронавирусот, цената на нафтата достигна историско најниско ниво и се продаваше и со негативни вредности, но потоа повторно се стабилизираше. Се очекува кон крајот на годината, цената на „црното злато” да се врати на ниво од пред појавата на вирусот Ковид-19.