Кредитните агенции „Фич” и „Стандард и Пурс” го потврдија уште еднаш кредтниот рејтинг на Македонија, при што „Фич” ја оценува земјава со ББ+, но сега со негативен изглед поради глобалната пандемија, додека „Стандард и Пурс” со ББ- со стабилен изглед.

Како што соопшти Министерството за финансии, и двете кредитни агенции, како резултат на ковид-19 кризата и проекциите за забавување на глобалната економија, предвидуваат контракција на економскиот резултат во 2020 година и опоравување, односно раст во 2021 година, со тоа што „Фич” проектира -4,2% за 2020 и 5,1% раст во 2021, додека „Стандард и Пурс” -5% во 2020 и 3,8% во 2021 година.

Кредитните агенции ги нотираат мерките кои се преземени од Владата, насочени кон зачувување на работните места, поддршка за најпогодените индустрии, како и меки регулаторни мерки. Како што се наведува и во двата извештаи, мерките ќе придонесат за зголемување на буџетскиот дефицит и ќе влијаат на зголемување на државниот долг кој според проценките на кредитните агенции ќе се приближи до 50%. Заедно со опоравувањето на економијата се предвидува и намалување и стабилизирање на буџетскиот дефицит.

„Кредитните агенции го оценуваат банкарскиот сектор како стабилен исто како и домашната валута која има фиксен курс со еврото.

И двете агенции како позитивно го оценуваат зеленото светло од Европската унија за почеток на преговори што заедно со спроведувањето на реформи може значително да придонесе за развој на економијата”, пишува во соопштението.