На состанокот во средата, американската централна банка Federal Reserve (Fed)ги зголеми клучните каматни стапки како и што се очекуваше, за дополнителни 0,75 процентни поени, втор месец по ред, на опсег од 2,25 до 2,50 проценти.

За само два месеци американската централна банка ги зголеми клучните каматни стапки за 1,5 процентни поени, што претставува најагресивно заострување на монетарната политика од 1990-тите.

На овој начин ФЕД се обидува да ја заузда високата инфлација, која моментално е на највисоко ниво во последниве повеќе од 40 години, односно од далечната 1981 година и изнесува неверојатни 9,1%.

Инвеститорите, пак, ги охрабри изјавата на претседателот на ФЕД, Џером Пауел кој на прес-конференцијата порача дека дека натамошните потези на централната банка ќе зависат од идните економски показатели и во иднина би требало да се очекува забавување на темпото на заострување на монетарната политика во САД, односно забавување на темпото на растот на каматите.

„Откако монетарната политика дополнително е заострена, во следниот период веројатно ќе е соодветно да биде забавено тоа темпо, додека не ги анализираме ефектите на прилагодувањето на нашата политика врз економијата и инфлацијата“, изјави Пауел.

Пауел порача дека економскиот раст забавува, но дека американската економија не е во рецесија, на што, меѓу другото, укажува силниот пазар на трудот. Вложувачите, имено, стравуваат дека агресивното зголемување на каматите ќе ја турне економијата во рецесија.