Планирате да земете кредит? Овие се неколку основни работи кои мора да ги знаете пред да влезете во банка.

Влеговме во новата 2021 година и веќе ја надминавме една од најтешките, една кризна година во која научивме дека здравјето ни е најважно од се, година во која научивме да живееме со новото „нормално”. Во годината којашто ни претстои се надеваме дека животот полека, но сигурно ќе ни се врати во нормала, дека луѓето повторно ќе почнат да се дружат и најубавите моменти кои ни ги подарува секојдневниот живот ќе ги поминуваат заедно.

Почетокот на годината значи и нови планови, нови инвестиции, но и финансиско планирање на претстојните 12 месеци.

За луѓето на кои им се неопходни финансиски средства и планираат да одат во банка и да подигнат кредит, решивме да ги советуваме за три работи кои се неопходни да ги знаат пред да аплицираат за кредит.

Во една банка треба да поставите три јасни прашања:

1. Kолку ќе ме чини да земам кредит?
2. колку ќе ми биде месечната рата? и
3. Kолку вкупно пари ќе треба да вратам вклучително со каматата?

Колку ќе ви биде ратата и колку навистина ќе ве чини тој кредит се клучни податоци кои ви се од неопходно значење да ги знаете.

Дали е значајно во која валута ќе биде кредитот?

• Луѓето се оптоваруваат за многу работи во врска со кредитите. Дали кредитот ќе биде во денари или во евра е сеедно. Потрошувачките кредити обично се издаваат во денари, станбените, хипотекарните и автомобилските кредити најчесто во евра, но исто така и во денари. Сепак, многу поважно од тоа во која валута е кредитот, е тоа дали сте финансиски способни да го исплатите до крај.

Доаѓаме до најважното, а тоа е дали сте кредитоспособни таа месечна рата да ја враќате во одреден број на години. Доколку имате висока рата која редовно ќе ја плаќате, но низ годините не ќе можете да купите ниту нова облека, ниту пак да одите на одмор на море, износот на кредитот или рокот на отплата не се соодветно прилагодени.

Кредитните референти во банка, се поставени секогаш да продадат максимален износ на кредит, без разлика дали толкав износ ви е потребен или не. Затоа, пред да се одлучите да подигнете кредит, аплицирајте само за износот кои навистина ви е неопходен, а не колку што ви нудат кредитните референти во банка. Секој дополнителен износ на кредит, значи и дополнителни камати и провизии.

Секако дека пари секогаш ќе ви бидат потребни, но кредит се зема само за тоа што ви е најнеопоходно.