На 12-ти август 2020 година, Народната банка, постапувајќи согласно со Законот за банките ја укина дозволата за основање и работење на Еуростандард банка АД Скопје. Укинувањето на дозволата се должеше на неисполнување на минимални законски услови за работење на една банка.

Најголемиот акционер во Еуростандард Банка АД Скопје, Трифун Костовски на неколку прес конференции посочуваше дека сценариото за ликвидација на Еуростандард банка се спремало со години, а тие кои знаеле од Народната банка дека ќе се затвори Еуростандард Банка, си ги повлекле парите навреме.

По речиси две години од објавата на Народната банка дека Еуростандард Банка АД Скопје оди во стечај, Трифун Костовски најави дека на 22 август ќе ја објави вистината за пропаѓањето на неговата Еуростандард банка и ќе го презентира извештајот од неговата приватна истрага.

„Со гордо срце и чиста мисла денеска официјално најавувам дека на ден 22 Август 2022 година во Скопје ќе биде обзнаен извештајот од мојата приватна истрага поврзана со стечајот на Еуростандард банка, која се работеше во изминатите 15 месеци.

Овој извештај е направен од тимот на експерти за банкарски криминал под водство на господинот Драго Кос. На неговата презентација пред македонската јавност ќе присуствуваат и еминентни стручњаци во банкарскиот систем од земји членки на Европската Унија.

Следете ме во борбата против организираниот криминал! Да ја откриеме вистината што пробаа да ја скријат!”, изјави Трифун Костовски.