Животното осигурување и во вториот квартал од оваа година забележува раст што е позитивен индикатор за движењата на пазарот за осигурување.

Растот од 9,62% во премија и 36,3% во бројот на продадени полиси ги прави овие класи со најголем раст на вкупниот пазар, покрај растот на здравственото осигурување. Значајно за забележување е дека класичното осигурување на живот оваа година има поголем апсолутен раст во споредба со осигурување на живот кога инвестицискиот ризик е на товар на осигуреникот, т.н. унит линк производи, тренд кој не беше присутен изминатите две години. Ниту една од компаниите чија дејност е животно осигурување сеуште нема реализирана премија во класа 20 – брак и породување.

Согласно податоците објавени на страницата на Агенција за супервизија на осигурување, трендот на динамичен раст и во вториот квартал од годината го задржува Триглав Осигурување Живот, со пораст во сите сегменти од работењето. Оваа Компанија годинава ги надминува сите параметри на конкурентите.

Имено, во првото полугодие од годината, Триглав Осигурување Живот има троцифрен раст на премијата и најголем апсолутен пораст на премијата на пазарот, над 45 милиони денари, што значително ја издвојува Компанијата во овој сегмент. Последно основаната Компанија на пазарот за животно осигурување, оваа година забележува и најголем скок во пазарниот удел, двојно поголем во однос на минатата година. Во бројот на продадени полиси предничи со дури 60% пазарен удел во 2021 година. Реална претпоставка е дека ваквите позитивни придвижувања се резултат на поврзувањето со неколку деловни банки во РСМ во доменот на банко осигурувањето.

Позитивни придвижувања, забележуваат и Уника Лајф и Винер Лајф и во раст на премијата и во бројот на продадени полиси. Значајно за забележување е дека Винер Лајф е единствена компанија на пазарот која има структура на реализирана премија во која предничи осигурувањето на живот кога инвестицискиот ризик е на товар на осигуреникот, т.н. унит линк производи. И двете компании имаат умерен но стабилен раст изминатите неколку години.

Типично за овој пазар е што во изминативе две години најголемите компании во овој сегмент, Кроациа Осигурување Живот и Граве Осигурување на живот забележуваат пад во своето работење. Во вториот квартал од оваа година најголем апсолутен пад на премијата има Граве Осигурување на живот, додека Кроациа Осигурување Живот има најголем пад во бројот на продадени полиси, 36% проценти помалку во однос на минатата година.

Иако Кроациа Осигурувањеима значителен пад на премијата неколку квартали по ред, сеуште ја има првата позиција на пазарот за животно осигурување во РСМ.