Сите трговски активности на Московската берза се суспендирани бидејќи рубљата и цените на акциите паднаа на долните граници поставени од берзата.

„Трговијата е прекината на сите пазари. Ќе биде дадено известување кога ќе продолжи тргувањето“, соопшти прес-службата на Московската берза, пренесува „Тас”.

Руската рубља денеска падна на рекордно ниско ниво, а еврото падна на повеќегодишното ниско ниво во однос на доларот и швајцарскиот франк по веста дека Русија извршила напад врз Украина.

Рубљата ја намали вредноста за дури 5,77 проценти на 86,1198 за долар. Московската берза ги прекина трговските операции на сите пазари поради падот на националната валута и цените на акциите.

Еврото ослабе за 0,84 проценти на 1,1209 долари, што е негова најниска вредност од 31 јануари. Единствената валута на еврозоната падна во однос на јапонскиот јен за 1,28% на едномесечен минимум од 128,37 јени, а за 0,84 отсто во однос на швајцарскиот франк на 1,0292 франци, што е најниско ниво од мај 2015 година.

Британската фунта се покажа релативно поотпорна, намалувајќи се за 0,41% на 1,3490 долари.

Индексот на американскиот долар, кој ја мери вредноста на доларот во однос на шесте главни конкуренти, порасна за високи 0,60%, на 96,762 поени, првпат од 31 јануари.