Петтиот сет економски мерки содржи вкупно 29 мерки, распоредени во четири главни столба: директна финансиска поддршка за компаниите во туризмот, занаетчиството, угостителството, транспортот, индустријата за организација на настани со цел задржување на работните места, финансиска поддршка за ликвидноста на приватниот сектор со бескаматни кредити со неповратна компонента, креирање поповолно деловно опкружување со системско редефинирање на Царинскиот тарифник, намалување на парафискалните давачки, даночно олеснување и одложување кај неколку јавни давачки, како и директна помош за граѓаните, соопшти денеска премиерот Зоран Заев.

Вкупната вредност на петтиот сет економски мерки вредат 9,7 милијарди денари (160 милиони евра) од кои 91,7 милиони евра од вредноста на пакетот се директни буџетски трошења.

„Првата мерка е финансиска поддршка за плати за вработените – вредна 1.920 милијарди денари. Ќе се субвенционираат платите за февруари и март годинава со што се очекува да се поддржи исплата на плати на повеќе од 60.000 работници месечно. Финансиската поддршка ќе биде скалеста од 14.500 до 21.776 денари за месечна плата по вработен за да се поддржат во домашните компании во зависност од тоа колкаво е процентуално намалувањето на приходите во месеците ноември и декември 2020 и јануари 2021 година споредено со ноември и декември 2019 и јануари 2020 година”, истакна премиерот.

Субвенција на платите за февруари и март ќе добијат компаниите кои имаат пад на приходите за повеќе од 30% во тие месеци.

„Првата мерка е опционална и компаниите имаат можност да одберат субвенции на платите за февруари и март или да ја искористат втората мерка, а таа е кредити со нулта каматна стапка во најпогодените дејности како што се туризам, занаетчиство, угостителство, транспорт, индустрија за организација на настани, приватни здравствени установи. Оваа мерка е во висина од 10 милиони евра и може да се аплицира во текот на целата тековна година. Во зависност од вкупниот зголемен обем на работа и добивката, скалесто може да добие и неповратен дел од кредитот од 30 до 50 проценти од самиот кредит”, додаде Заев.