Стопанска банка а.д. Битола ја прошири својата понуда на платежни картички со новата Mastercard Business Revolving картичка која е кредитна картичка наменета за безготовинско плаќање во трговската мрежа и повлекување на готовина од сите банки и банкомати во земјата и странство, за бизнис потреби.

Оваа картичка се разликува од останатите картички од овој тип на пазарот од повеќе аспекти. Пред сe, оваа бизнис кредитна картичка е со најконкурентни услови на пазарот, односно, најниска каматна стапка од 7,99% фиксна во првата година и 10,99% прилагодлива каматна стапка, по првата година. Mastercard Business Revolving кредитната картичка функционира на принцип на минимална месечна отплата на само 10% од износот на користениот кредит во тековниот месец, а максималниот лимит на одобрување е 1.000.000 денари и на истиот има можност за користење секаде каде што е истакнат знакот на Mastercard.

Но, оваа картичка не е единствена само по најповолните карактеристики туку она кое ја прави дополнително атрактивна е и нејзиниот посебен дизајн. Имено, се работи за дизајн директно инспириран од делата на македонскиот уметник Владо Костов кој е познат по изработувањето на невообичаени скулптури од старо отпадно железо. Инспирацијата за изработувањето на овие несекојдневни скулптури со уште поневообичаени материјали како што вели Костов ја наоѓа во верувањето за давање на повторен живот на нештата преку повторна употреба, односно, рециклирање на материјалите како во еколошка така и во естетска смисла.

„Создавањето на нов производ за нас е многу повеќе од креирање на поволна понуда за потрошувачите. Тоа за нас претставува процес во кој внимателно се разгледуваат и разработуваат сите аспекти кои креираат една целина. Во таа финална целина се стремиме да создадеме производ кој со своите поволни карактеристики совршено одговара и на најспецифичните потреби на нашите клиенти и секогаш во таа целина внимаваме да оставиме простор за еден многу важен сегмент кој ја дополнува сликата за производот, односно, додавањето на дополнителна вредност на истиот како што е во овој случај пораката која ја испраќаме за силната поддршката која ја изразуваме за заштита на планетата. Секогаш го почитуваме и поддржуваме секој потег чија цел е подигнување на свеста за значајни прашања од кои зависи општественото добро. Овој вид на уметност кој го практикува Костов е посебен сам по себе. Одлуката за користење на овој дизајн ја донесовме многу лесно фасцинирани од начинот на кој тој се одлучил да ја прикаже важноста за заштитата и обновата на планетата, важноста и моќта на рециклирањето на материјалите и сето она кое може да придонесе генерално за општото добро.

Како компанија која безрезервно поддржува и помага голем број на општествено одговорни практики, за оваа актуелна тема која сите поедеднакво не засега сметавме дека и преку овој алтернативен начин на испраќање на пораката можеме да влијаеме на подигнување на свеста за важноста на овој проблем.’’ – велат од Стопанска банка а.д. Битола.