Данската банка Nordea Bank Abp направи потег кој во изминативе години беше незамислив за банките ширум светот, понуди станбени кредити без камата!

Данските медиуми известуваат дека Nordea Bank Abp во своето портфолио на производи кои ги нуди на граѓаните објави дека започнува со понуда на кредити за купување недвижен имот со каматна стапка од неверојатни 0 (нула) проценти.

Понудата на данската банка е со фиксна рата за отплата на кредитот со рок до 20 години.

Nordea Bank Abp понуди ваков производ по најавата на конкурентската Jyske Bank A/S која најави дека ќе им понуди на клиентите кредити со рок на отплата до десет години со негативна каматна стапка од половина процент. Тоа всушност значи дека наместо клиентот да плати одредена камата за парите кои што ќе ги подигне, банката ќе му даде пари доколку се одлучи да подигне кредит за недвижен имот од Jyske Bank A/S. Односно, со земање на кредит за стан, клиентот како да вложил пари во заштеди со каматна стапка од 0,5%.

”Никогаш досега не било поевтино да се задолжиш. Очекуваме дека ова ќе придонесе за зголемување на цените на недвижностите“, изјави Лисе Нитофт Бергман, главна аналитичарка во секторот за станбено кредитирање на Nordea Bank.

Ја пренесе и негативната страна на целата приказна.

”Ова е одлично за клиентите, но навистина е непријатно да се знае податокот дека има финансиски институции подготвени да позајмуваат пари без заработка“, изјави Бергман.

Во светот веќе станува реалност да се земе кредит без дополнителни камати и трошоци, но дали може да очекуваме и од нашите банки да го следат овој тренд и да понудат кредити без камата или се тоа ќе остане само фикција за клиентите!?