Светската банка издвои 12 милијарди долари за набавка и дистрибуција на вакцина против коронавирусот, како и за тестови и лекови за борба против ковид-19, рече претседателот на Светска банка Дејвид Малпас на состанокот на министрите за финансии на Г20 и централните банки во петокот.

„Парите на Светска банка се наменети за жителите на 112 земји”, изјави Малпас.

Тоа е дел од пакетот во износ од 160 милијарди долари, кој Светска банка има намера да го насочи во борбата против последиците од пандемијата до 30 јуни 2021 година.

„Имаме програми за итни случаи за здравствени проблеми во 112 земји и користиме брз механизам што сега овозможува пристап до 12 милијарди долари за набавка и испорака на вакцини“, рече Малпас.

Тој додаде дека Меѓународната финансиска корпорација (дел од Светска банка) работи на инвестирање на дополнителни четири милијарди долари во производство и дистрибуција на вакцини и средства за програми за вакцинација.