Рускиот бруто домашен производ (БДП) се намали за 4 проценти на годишна основа во вториот квартал од оваа година, бидејќи западните економски санкции влијаат на руската економија, објави руската агенција за статистика „Росстат”.

„Во периодот од април до јуни, според прелиминарните проценки, БДП изнесува 96% од разликата постигната во истиот период во 2021 година“, се наведува во соопштението за јавност на „Росстат”.

Станува збор за објавување податоци за движењето на рускиот БДП во првиот од трите месеци кои беа целосно одбележани со војната во Украина, посочува „АФП”.

Неколку светски финансиски институции ги намалија економските изгледи за Русија и Украина по почетокот на руската инвазија на Украина. Во мај, Европската банка за обнова и развој (ЕБОР) предвиде за Украина дека нејзиниот БДП оваа година би можел да падне за високи 30 проценти, додека економската активност во Русија би можела да се намали за 10%.

Пред Русија да ја започне својата инвазија на Украина на 24 февруари, лондонската банка предвидуваше раст од 3,5% за Украина оваа година и зајакнување од 3 проценти за Русија.

Светската банка во средината на април објави дека БДП на Украина оваа година ќе падне за неверојатни 45,1%, а на Русија за 11,2 проценти.

По започнувањето на војната, многу западни земји воведоа санкции против Русија, со кои сакаат да ја ослабат руската економија и нејзиниот претседател Владимир Путин.