Во текот на вчерашниот ден руската влада на чело со рускиот претседател Владимир Путин воведоа итни мерки со цел да се одржи стабилноста и вредноста на домашната валута, која почна вртоглаво да ја губи својата вредност, достигнувајќи рекордно најниско ниво.

Мерките кои ги воведоа властите беа забрана за руските државјани да префрлуваат пари во странство, но и ограничување за купување на странски валути.

Во обид да го спречи масовниот тренд на граѓаните да ги заменуваат рубљите во странски валути поради страв од губење на нејзината вредност како резултат на инвазијата на Украина, руската Централна банка воведе провизија од 30 проценти при купување на странски валути, пренесува „Reuters“.

Руската централна банка претходно ја зголеми основната каматна стапка од 9,5 на 20 проценти за да се спротивстави на ризиците од падот на вредноста на рубљата и повисоката инфлација, додека официјалните лица се обидуваат да ги менаџираат последиците од западните санкции.