Швајцарската централна банка оствари рекордна годишна загуба од 132 милијарди швајцарски франци (143 милијарди долари) во 2022 година, најголема во нејзината 115-годишна историја.

Причината е падот на пазарите на капитал и фиксниот приход што ја погоди вредноста на нејзиното портфолио на акции и обврзници. Негативно влијаеше и зајакнувањето на швајцарскиот франк, пренесува „Reuters”.

Провизорната бројка од понеделникот, која означи пресврт од добивката од 26 милијарди франци во 2021 година, е далеку повисока од претходната рекордна загуба од 23 милијарди франци во 2015 година. Тоа е малку повеќе од годишниот БДП на Мароко.

Во текот на минатата година, девизните резерви на швајцарската централна банка се намалија за 17 проценти, од 945 милијарди на 784 милијарди франци.

Од друга страна, швајцарската централна банка од поскапувањето на златото заработи околу 400 милиони франци, додека од загубата на вредноста на имотот во франци загуби околу една милијарда франци.

Не само што државата нема да добива приходи во буџетот, туку дивиденда нема да добијат ниту акционерите на швајцарската народна банка. За разлика од другите централни банки, таа во Швајцарија е акционерско друштво чии акции се тргуваат на берзата. Околу половина од акциите се во сопственост на државни институции, додека останатите се во рацете на фирми и физички лица.