„Печатењето на голема количина на американски долари за покривање на буџетскиот дефицит на САД влијае на целата светска економија”, изјави рускиот претседател Владимир Путин.

Според него, инфлацијата во САД надминала 5,0 проценти, додека проектираната стапка на инфлација се движи околу 2,0 проценти. САД веќе две години по ред прават буџет со дефицит од 15 проценти, пренесува агенцијата „ТАСС”.

„Значи, тие го покриваат овој дефицит за сметка на што? На сметка на емисијата на доларот. Од тука доаѓа инфлацијата“, рече Путин, отворајќи состанок за економски прашања, на кој присуствуваа највисоките руски финансиски, економски и монетарни претставници.

Тој додаде дека, се разбира, тоа целосно влијае на целата светска економија, имајќи ја предвид важноста на американската економија за целиот свет и улогата на доларот како најголема, најбарана резервна валута.

Путин ги повика учесниците на состанокот да се фокусираат на начинот на кој руската економија ќе ги надмине последиците од пандемијата на коронавирусот.

„Гледаме дека глобалното економско закрепнување генерално продолжува со прилично високи стапки, но овој процес е исто така поврзан со ризиците од инфлација“, додаде тој.