Граѓаните кои ја користат апликацијата „Мој ДДВ“ и скенираат фискални сметки деновиве треба да си ги проверуваат трансакциските сметки бидејќи во тек е исплатата на повратот на ДДВ за скенираните сметки во третото тромесечје односно за месеците јули, август и септември.

Овој пат, исплатата е малку подоцна од вообичаеното поради исплатата на парите од повратот од Викендот без ДДВ. Сепак дел од граѓаните веќе добиле пари, останатите да очекуваат деновиве. Податоците се обработени и сега парите веќе се префлаат на сметките. Инаку Управата за јавни приходи има рок да го изврши повратот 60 дена од денот на последната скенирана сметка во тримесечјето.

По овој основ, според податоците УЈП треба на граѓаните да им исплати речиси 430 милиони денари.

Во текот на третото тримесечје, односно во месеците јули, август и септември 2020 сппред податоците, остварен е промет од 29,8 милијарди денари, од кои прометот од македонски производи изнесува 7,8 милијарди денари, а прометот од останати производи изнесува 21,9 милијарди денари.

Преку апликацијата „Мој ДДВ“ за скенираните фискални сметки на граѓаните им се врши поврат од 20 проценти за платениот ДДВ за македонски производи и услуги, и 10 проценти за останатите добра и услуги.