Преку мерката мој ДДВ во изминатите три години кај граѓаните кои скенираат фискални сметки се вратени 4,2 милијарди денари или близу 68,3 милиони евра.

Апликацијата мој ДДВ стартувала со 212.776 корисници, а денеска брои близу 460.000 корисници и бројот расте во континуитет.

Директорката на Управата за јавни приходи, Сања Лукаревска на вчерашната прес-конференција информираше дека во наредниот период во координација со Министерството за финасии ќе поднесат предлог измена на Законот за враќање на дел од ДДВ на физички лица. Оваа измена е со цел од 1 јануари 2023 да се зголеми лимитот на повратот со што наместо 1.800 денари за тримесечие, граѓаните ќе може да добијаат максимален износ од 2.100 денари.

Доколку се усвои овој предлог, наместо досегашните максимални 7.200 денари за една календарска година, граѓаните ќе имаат можност да добијат 8.400 денари со скенирање на фискални сметки.