За денеска во Собранието е закажана надзорна расправа на тема „Утврдување на причините и извршувањето на законите во постапката за доведување до стечај на Еуростандард банка АД Скопје“.

Надзорна расправа ќе започне во 13 часот со воведно обраќање на претседателот на Комисијата.

На расправата поканети се гувернерката на Народна банка Анита Ангеловска-Бежоска во својство на сведок, сопственикот на Еуростандард банка Трифун Костовски, директорот на Управата за финансиска полиција Арафат Муареми, јавниот обвинител Љубомир Јовески, министерот за финансии Фатмир Бесими, стечајниот управник на банката Душко Тодевски, повеќе истакнати банкари како Глигор Бишев, Абдулменаф Беџети, Никола Поповски и голем број на пратеници од повеќе политички партии.

Додека трае надзорната расправа, Здружението на оштетени штедачи на Еуростандард банка АД Скопје најави протест во 15 часот пред Собранието на С. Македонија каде во исто време ќе се одржува надзорната расправа на која ќе учествува г-ѓа Оливера Клинчарова, претставник на Здружението на оштетени физички и правни лица „Правда за штедачи’’- Скопје, којашто воедно е член на Иницијативниот Одбор.

Дали на оваа надзорна расправа конечно ќе се добие одговорот на толку поставуваното прашање: „Кој е виновникот за пропаѓањето на Еуростандард Банка АД Скопје!?”