Блаж Бродњак, претседател на Извршниот одбор на Нова Љубљанска банка во Словенија, изјави дека банката која направи огромна капитална инвестиција со купувањето на српската Комерцијална банка пред неколку дена, сè уште не одлучила дали да го задржи брендот на Комерцијална банка.

„Комерцијалната банка во Србија е вреден, јак бренд, тоа секако го имаме во предвид и треба да бидеме паметни. Сè уште не сме одлучиле дали да ќе го задржиме брендот Комерцијална банка“, одговори Бродњак на прашањето на „Nova.rs” дали ќе се задржи брендот и името на Комерцијална банка а.д. Белград.

За потсетување, претходната недела српската влада го продаде својот контролен пакет од 83,23% обични акции кои ги поседуваше во Комерцијална банка а.д. Белград на Нова Љубљанска банка (НЛБ) за 387,02 милиони евра.

Тоа значи дека државата го продаде својот удел во една од највредните српски финансиски институции по цена која приближно одговара на вкупната вредност на банката на белградската берза, но и по цена која е за 40% пониска од таа што ја плати кога ги купи акциите од Европската банка за обнова и развој и Меѓународните финансиски корпорации, пренесува порталот „НоваЕкономија“.

Во процесот на подготовка за целосна приватизација, државата Србија откупи голем дел од акциите од овие инвеститори, трошејќи 265 милиони евра за околу 35% од акциите.

По таа цена, Србија ја вреднуваше банката во висина од 650 милиони евра односно 38 евра по акција или 40% повеќе од сегашната договорена цена.

Исто така, беше договорено дека државата ќе добие приходи од камати по каматна стапка од 2% на годишно ниво, камата што Нова Љубљанска банка (НЛБ) би била обврзана да и ја плати на Србија, за периодот од 1 јануари 2020 година до денот на комплетирање на трансакцијата. Во договорот е предвидено и исплата на дивиденда на 50% од прикажаната добивка за 2019 година, при што на државата Србија би и следувало околу 31 милиони евра.

Исто така, предвидена е исплата на дивиденди и од претходните години, врз основа на што Србија ќе добие дополнителни 26 милиони евра, се додава во соопштението.