Нова Љубљанска банка (НЛБ) оствари нето добивка од 18,3 милиони евра во првиот квартал од оваа година, што е за 68 проценти помалку отколку во истиот период претходната година, објави најголемата словенечка банка.

Падот на профитабилноста во Нова Љубљанска банка (НЛБ) се објаснува со кризата поради епидемијата на коронавирус и растот на прилагодувањата на вредностите и резервациите, што енормно се искачи од 600 илјади евра во првиот квартал од минатата година на 28,3 милиони евра во првиот квартал од оваа година.

Според податоците од финансискиот извештај, како резултат на коронавирусот, во првиот квартал се формирани дополнителни прилагодувања на вредноста и резервации во висина од 24,5 милиони евра.

Нето-приходите од камати на Нова Љубљанска банка (НЛБ) во првите три месеци од оваа година достигнаа 77,4 милиони евра, што претставува намалување за три проценти во однос на истиот период лани.

Нето приходот од надоместоци и провизии, од друга страна, се зголеми за шест проценти, на 42,4 милиони евра.

Депозитите на клиентите во првиот квартал се зголемија умерено во однос на крајот на минатата година, додека бруто-кредитите на крајот на првиот квартал изнесуваа 8,13 милијарди евра, што е за два проценти повеќе отколку на крајот на последниот квартал од 2019 година.

НЛБ одржува силна ликвидна позиција на ниво на Групацијата и на ниво на нејзините членки. Вкупната стапка на капитал е 18,5 проценти, што е цврста основа за покривање на сите регулаторни барања во однос на капиталот и во влошени и заострени околности на епидемијата на коронавирус, објави НЛБ.