НЛБ Групацијата оствари нето добивка од 73,7 милиони евра во првата половина од оваа година, што е за 22 проценти помалку во однос на истиот период претходната година, објави најголемата словенечка банка.

Бизнисот во првите шест месеци беше одбележан со епидемијата на вирусот Ковид-19, но надзорниот одбор утврди дека групацијата работи стабилно и профитабилно, и покрај растот на прилагодувањата на вредностите и резервациите, објави НЛБ.

Во првите шест месеци, НЛБ Групацијата оствари нето приходи од работењето во износ од 260 милиони евра, што е идентично како и во првото полугодие од минатата година, и речиси непроменета добивка пред исправка на вредноста и резервации во износ од 115,2 милиони евра, што претставува намалување од еден процент споредено со истиот период лани.

Прилагодувањата на вредностите и резервациите во првото полугодие изнесуваат 33,2 милиони евра, наспроти 5,5 милиони евра во истиот период од претходната година.

Негативното влијание на корона кризата беше делумно компензирано со еднократна продажба на должнички хартии од вредност во износ од околу 330 милиони евра, што имаше позитивно влијание врз работењето на НЛБ Групацијата во износ од 17,2 милиони евра и успешната продажба на НЛБ Вита во вториот квартал со придонес од 11 милиони евра.