Connect with us

Business Woman

На вкусен ручек со Ирина Јаневска од coolinari.mk

Објавено

на

Coolinari.mk е идеја во доменот на социјалното претприемништво. Како таква се развива успешно веќе неколку години и има големо влијание во дејноста на кулинарството и успева да направи промена.

Ирина Јаневска, ќе ни објасни кон што се стремат нивните кулинари, што постигнале до сега и што е тоа што ги прави социјално претрпријатие.

Банкарство: Како дојде до идејата за coolinari.mk?

Ирина: Долгата приказна раскажана на кратко, е дека пред неколку години, решени дека сакаме да работиме заедно, со еден пријател посетувавме обука за отварање на стартап, и бевме воодушевени од младите угостители кои вториот ден од обуката беа задолжени за припрема и послужување на ручекот за сите учесници. По самото завршување на обуката се појави повик за поддршка на социјално претприемништво, и така, еден ИТ мозок и една активистка, одлучија да побараат поддршка за финансирање на идејата „Младинска професионална кујна: нови технологии за социјален бизнис“. Поддршка добивме, проектот доби свои мобилни апликации „ Рецептко“ и „Мојкетеринг“ и брендинг со препознатлив слоган „Кул е да си кулинар“. Така почнавме и така coolinari.mk стана еден од најпрепознатливите проекти на здружението „АРНО“.

Банкарство: Интересно е да се напомене дека работите со средношколци од СУГС “Лазар Танев„ за неформална едукација околу кулинарството. Тука се и часовите за готвење. Какво влијание имаат вашите активности врз средношколците, но и врз општеството?

Ирина: Младите ученици-готвачи се големи сунѓерџиња. Програмата за неформално образование ја почнуваме секоја година  со гледање и дискусија на филмот „Рататуи“- филм за глувче кое сонува да стане познат готвач. Во текот на годината организиравме Часови за готвење на кои самите ученици беа асистенти на познатите готвачи (Марк де Јонг, Маре Јаневска и др.),но им помагаа и на учесниците. На почетокот секој час за готвење го отвара ученик- готвач со вовед во хигиена, правилно држење на нож и техники за сецкање. За време на викендите со учениците одржуваме работилници заCV, фотографирање на храна, објавување на Фејсбук и твитер за себе-промоција, обуки за лидерство, комуникациски вештини. Сите овие обуки генерираат млади кои не само што се помотивирани за својата кариера, туку се и подобро подготвени со соодветни вештини за пазарот на труд. Тие полесно наоѓаат работа, преговараат за плата, и свесни се дека треба да напредуваат и учат.

Банкарство: Вие сте еден од победниците на Наградата за социјално претприемништво. Како оваа награда го смени патот на coolinri.mk?

Ирина: Првиот наш обид беше доста амбициозен за 2013-та година, користењето на ИТ техологии беше неколку чекори понапред од вистинска слика во реалност. Благодарение на Наградата за социјално претприемништво се вративме во офлајн светот. Сфативме дека за вистински да ги мотивираме учениците, пред се, треба да ги изградиме нивните вештини, а од друга страна за да го промовираме стручното образование треба да покажеме колку готвењето е атрактивно и посакувано, и за кариера , и за хоби. Преку Наградата за социјално претприемништво исто така вистински „се пробавме“ на пазарот, и сфативме колку е различен комерцијален наспроти НВО-пристап. Со искуството зад себе, сега повторно ќе нудиме/продаваме „Часови за готвење“ во соработка со „Лазар Танев“ , но овој пат и во проширено партнерство заедно со Здружението за заштита, промоција и едукација за храна „Слоу фуд Водно“.

Банкарство: Која според Вас е важноста на социјалното претприемништво за едно општество, а особено за држава која сеуште е во развој?

Ирина: За мене социјалното претприемништво е граѓански одговор на капитализмот. Во свет со ваква динамика и односи, во целата трка за профит, компаниите ги забораваат оние на маргините и не се грижат многу  за еколошките ризици. Социјалните претпријатија наспроти тоа, поради силната социјална мисија се грижат за сите, и се грижат и за околината.  Одржливоста на социјалните претпријатија е потешка, потребна е голема свест кај граѓаните и сите чинители. За државите во развој, или на пример во Македонија каде пазарот е мал,  тешко е, но не и неизводливо  функционирањето на социјалните претпријатија. Ние имаме и пример за кооперативи од минатото, а имаме и голем индекс на солидарност што ќе каже всушност дека луѓето ценат кога некој производ/услуга има повисока социјална цел.

Банкарство: Како дојдовте до идејата за mojketering.mk?

Ирина: СУГС „Лазар Танев“ во рамки на своето работење нуди  кетеринг  услуги, кои се дел од нивна социјално- претприемничка активност. Токму овие кетеринг услуги беа нашиот прв контакт и  не’ воодушевија и инспирираа да работиме со училиштето.  Она што го забележавме  е дека иако има голема понуда, пристојни цени и професионална услуга, граѓаните малку знаат за кетерингот. Одлучивме да ангажираме фотограф кој изработи фотографии од целата понуда, веб дизајнер и програмер кои ја создадоа дестинацијата www.mojketering.mk . Ние преку различни активности ја промовираме оваа услуга од училиштето. Институциите во голема мера ги користат услугите, а благодарение на промоцијата од „АРНО“ оваа веб-страница беше вистински посетена и користена.

Банкарство: Која е Вашата најголема мотивација во работењето?

Ирина: Доколку зборувам за coolinari.mk, нема да кријам дека како гурман особено ме привлекуваат многуте вкусови, заедничкото готвење, учењето еден од друг и дружбата со младите. Сепак најголема мотивација ми е кога гледам со колку малку интервенција и поттик можеме да смениме животи. Особено ме радува кога наместо првична замисла на учениците-готвачи да работат како келнери поради бакшиш, тие се враќаат кон своите готвачки кариери и напредуваат, се вработуваат во реномирани локали и се отворени да учат и понатака.

Business Woman

Црвенкоска: Сите попусти и намалени цени на едно место, Акции.мк ќе ви го олесни секојдневието

Објавено

на

Дали ги следите акциите на производите, барате ли каде е поевтино и каде може да добиете најдобра понуда? Доколку не сакате да гледате низ десетина сајтови или печатени каталози тогаш новиот мобилен продукт Акции.мк може да биде вистинско решение. Акции.мк на македонските корисници им нуди директен и електронски преглед на сите акции на производи со намалени цени во супер маркетите, веледрогериите, продавниците за електроника и други ланци. За развојот на Акции.мк разговараме со креаторот Елеонора Црвенкоска од компанијата Different која открива најпрво како настанала идејата за создавање на ваков вид на решение кое треба да ги поврзе купувачите и трговците, но и како планираат да го развијат нивниот бизнис модел. Колку една апликација како Акции.мк може да го олесни вашето секојдневие, прочитајте од интервјуто во продолжение.

Банкарство: Што ве мотивираше да ја изработите апликацијата akcii.mk, може ли да ни дадете повеќе за вашето досегашно искуство и како функционирате како тим?

Црвенкоска: До идејата дојдовме случајно и од потреба, имено како и секоја идеја која се раѓа од потреба така и akcii.mk има за цел да олесни некаков процес од нашето секојдневие односно корисникот да ја добие посакуваната информација на едно место.

Пресвртен момент беше кога една госпоѓа во еден маркет купувајќи ист продукт како и јас ме запраша која е цената, јас и одговорив и потоа ми кажа: „а не, ќе чекам до утре, ќе го купам од друг маркет, таму утре ќе биде на акција“. Разликата изнесуваше 4 ден, а самиот продукт чинеше 150 ден, што значи на акција истиот продукт во другиот маркет утредента изнесуваше 146 ден.

И тогаш си реков „ако може некој да чека еден ден и будно ги следи акциите на маркетите за толку мала разлика, а сепак самиот продукт и не е баш во буџет категорија тогаш би било многу фино доколку може да се интегрираат сите акции од сите маркети или малопродажни места од сите категории на едно место“, и така започна се, односно да креираме мобилна апликација и сајт кои ќе им овозможат на потрошувачите да може да ги прегледуваат сите акции од сите малопродажни места и категории на едно место.

Знаеме дека денес сите сме опкружени со информации кои ги црпиме преку нашите паметни телефони, а како канали на дистрибуција ги користиме социјалните мрежи или одредени апликации. Нашите навики секојднево се трансформираат, ако претходно повеќето податоци ги прибиравме преку хартиен медиум денес дигитализацијата се почесто се интегрира во нашето секојдневие.

Така и една од целите на нашата апликација akcii.mk е да ја замени хартиената форма на објавување на самите акции. Сигурна сум дека многу пати сите ние кога добиваме каталози во нашите поштенски сандачиња или на врата многу често ги фрламе без да ги погледнеме или пак само кратко фрламе поглед и потоа ги одложуваме во корпата за смет. Ова укажува на фактот дека информацијата не стигнува до посакуваниот консумент односно информацијата се дистрибуира масовно па на тој што му треба ќе ја анализира, а на тој што не му треба едноставно веднаш се ослободува од неа. Но, тоа креира непотребно користење на хартија, непотребни трошоци за да испечатите каталози и најважно од се непотребен смет по влезови од згради, улици и итн…

Банкарство: Може ли да ни објасните како се користи akcii.mk, кои се нејзините предности и на кои платформи е достапна?

Црвенкоска: Во нашиот сегмент односно нашата апликација од самиот почеток знаевме дека главните корисници на каталози за акции се потрошувачи со старосна возраст од +50 години, па затоа целта ни беше да самата апликација биде што полесна за користење, да не ги оптоварува корисниците со премногу опции и информации, да е лесно читлива и да може типкањето за пребарување или внесување на било какви информации или податоци да биде изведено во кирилично или латинично писмо односно да не мора корисникот да менува писмо туку веднаш апликацијата ќе го препознае јазикот и ќе ја презентира побараната информација без разлика со кое писмо е напишана.

Имено, апликацијата е достапна на iOS (Apple) и Android. Со нашата апликација корисникот дигитално ги добива во било кој момент сите информации од сите малопродажни места од сите категории: супермаркети, техника, дом и градина, аптеки, и најважно од се, може да се пребарува по продукт на нашата апликација. Тоа значи дека ако сега на вас ви е потребно да купите детергент, нов телевизор или пелени за бебе веднаш ќе добиете преглед на пребараниот продукт од наефтин кон најскап, по бренд и кај кој трговец, а притоа во самата апликација има и алатка да истиот продукт го внесете во вашата корпа и така ќе можете да креирате листа на продукти што ви требаат и од каде можете да ги набавите истите. Што значи, процесот комплетно го скратуваме, информацијата е достапна веднаш и во било кое време, и да не заборавиме допринесуваме кон почиста околина и средина бидејќи ја намалуваме потребата за печатење во хартиена форма за истите рекламни материјали.

Банкарство: На кој начин ги собирате податоците од страна на маркетите и колку истите се ажурираат?

Материјалите ги собираме електронски од сите поголеми трговци за храна, техника, дом и градина и дрогерии. Ги ажурираме во ист момент кога и самите трговци ги објавуваат.

Банкарство: Дали планирате да лансирате и десктоп верзија на akcii.mk за полесен пристап на корисниците од било кој уред?

Секако, но пред се сакаме да ја развиеме и распространиме употребата на апликацијата преку паметните телефони од причина што денешните web пребарувања се повеќе извршени преку паметните телефони а самата апликација го заменува класичното web пребарување но, сепак во план ни е да имаме и приказ преку web платформа.

Банкарство: Може ли akcii.mk да прерасне и во шопинг платформа во директна соработка со самите маркети, на кој начин би го развиле вашиот бизнис модел?

Уште од самиот почеток кога ја евалуиравме потребата за апликација како akcii.mk воочивме дека во иднина ќе можеме да интегрираме online купување како додадена вредноста за самите трговци, со други зборови, штом корисникот ќе го пронајде продуктот што го интересира ќе можеме да го поврземе со самиот трговец за online купување доколку и самиот трговец ја нуди истата можност.

Како би ја избегнале неизвесноста од тоа дали трговецот нуди online купување и дали истиот врши достава, нашата следна амбиција и цел е да оствариме соработка со компанија која има развиено добра логистичка мрежа за експрес достава и на тој начин ќе можеме да им понудиме на корисниците комплетно решение односно преглед на продукт и достава на истиот за не повеке од 45 минути.

Продолжи со читање

Business Woman

Три Македонки прогласени за „Најжена на 21 век“ во Белград

Објавено

на

Агенција „Марили“ која 24 години ја поддржува успешноста на жената во бизнисот како претприемач, менаџер и лидер се гордее со проширувањето на соработката на бизнисите предводени од жени на регионално ниво. Токму жените менаџери – лауреатки од манифестацијата на „Марили“ – „Избор на топ 10 најуспешни жени менаџери од Македонија“ се дел од наградените на регионалната манифестација „Најжена на 21. век“, што претставува верификација на напорите на агенција „Марили“ да ја промовира успешната жена во бизнисот во нашата земја, но и надвор од неа. (more…)

Продолжи со читање

Business Man

Challenger: Бизнисите да се приклучат на платформата за да бидат „зелени“

Објавено

на

Challenger е новата мобилна апликација за која мора да знаете, бидејќи кога ќе биде лансирана не смеете никако да ја пропуштите. Challenger е нов македонски стартап кој сака преку мобилна апликација да ги менува здравите навики на македонските граѓани, повеќе да поминуваат „зелени“ километри, да собираат поени, а со тоа и соодветни награди и признанија. Исто така Challenger сака да ги поттикне на општествена одговорност компаниите и институциите со цел да се креира нова зелена маркетинг платформа која ќе нуди многу предности. За начинот на кој функционираат како стартап, за пристапот до финансии за развој на идејата и техничкото решение, како и за тоа што ќе понуди апликацијата разговаравме со Теодора, Стефан, Олга и Митко од Challenger.

Што е Challenger? За кратко време успеавте да соберете многу внимание од јавноста која очекува многу интересен проект, особено пред почетокот на зимата кога се враќаат темите за загадувањето и проблемите со здравјето на луѓето?

Challenger e мобилна апликација за сите кои сакаат да добијат некоја награда за своите поминати зелени километри (пешки или на велосипед). Ние сакаме да ги предизвикаме нашите сограѓани, независно дали млади, студенти, родители, возрасни, активисти, оние кои се движат, кои сакаат да бидат промената во ова општество, или пак оние на кои им недостасува поттик да поминат километар повеќе, па и онаа група на луѓе кои се веќе наши локални еко супер херои.

Challenger ќе функционира на следниот начин:

1.Поминатите километри со пешачење или пак додека возите велосипед се претвораат во  Challenger поени
2. Challenger поените се заменуваат со кодови за попусти или пак бесплатни производи/услуги
3. Challenger е начин заедно да се избориме за почист воздух, да го намалиме секојдневниот сообраќаен метеж, затоа поставуваме предизвици (дневни,неделни или месечни) и за секое успешно исполнување се добиваат директни награди

Веројатно тоа што го привлече вниманието на јавноста, на наша голема среќа, е токму пристапот на нашето решение, а тоа е дека само како заедница на граѓани, бизниси и организации може да направиме промени. Затоа сакаме сите да ги повикаме да ни се приклучат во остварувањето на нашата цел, и заедно да бидеме дел од решението на аерозагадувањето, а не од проблемот.

Кој стои зад Challenger, може да ни раскажете како се склопи тимот и успевате ли да ја усогласите вашата визија, колку е голем предизвикот да се работи на ваков проект?

Приказната на Challenger започна на минатогодишниот StartupWeekend Скопје. Кога ќе се свртиме наназад сфаќаме дека работиме заедно веќе година дена, и тоа ни се чини нереално, бидејќи времето лета, како вчера да бевме во CeedHub. Еуфоријата која ја добивме не мотивираше да продолжиме првите месеци. Потоа дојдоа вистинските предизвици, кој од нас ќе продолжи да работи, како да го оформиме производот, да решиме во кој правец ќе продолжиме…. Процесот беше далеку од лесен, но едно е факт сите сме заљубени во Challenger, едноставно сонуваме да успее. Веројатно тој жар кај сите е тоа што не натера да аплицираме на различни натпревари каде што добивме и признанија. На кратко позади идејата на Challenger се Теодора, Стефан, Олга и Митко, кои воедно се основачи и на компанијата GreenIT. Наскоро ќе објавуваме и интересни текстови од нашиот тим, односно како се справувавме со нашите предизвици, избор на технологија, како ние го гледаме нашиот тим итн., така да следете го нашиот блог на www.challenger.mk 🙂

Кои ќе бидат главните цели на Challenger и како очекувате да се вклучи бизнис секторот во вашата приказна?

Главната цел на Challenger e да биде платформа преку која ќе се создава една општествено одговорна – зелена заедница, каде што луѓето развиваат навики да користат алтернативни методи на транспорт, а од друга страна локалните бизниси го подржуваат ова однесување.

Challenger е единствена платформа преку која бизнисите ќе можат да се вклучат на трендот, да бидат препознаени како зелени бизниси. На кратко бизнисите ќе може да спонзорираат предизвици и за истите да даваат директни награди на учесниците кои успешно го исполниле тој предизвик. Дополнително во нашата Challenger продавница бизнисите може да поставуваат бесплатни, или кодови за попуст за своите услуги и производи, а со самото тоа стимулираат и општествено одговорно однесување помеѓу своите сограѓани.

Ние велиме, времето да се биде ЗЕЛЕН бизнис е СЕГА, затоа им овозможуваме на бизнисите алатка без да трошат дополнителни ресурси.

Имате ли искуство со наоѓање на финансии од банкарскиот сектор, дали е тоа чекор на кој ќе треба да работите и што очекувате?

Во изминатиот период бевме во инкубациска програма подржана од банка, каде што се одборува кредит со ниска каматна стапка. Поради фактот дека сме на самиот почеток и се трудиме да го испробаме нашиот бизнис модел на пазарот, се уште не сме подготвени за подвиг на добивање финансии од банкарскиот сектор. Како нов startup, гледаме рационално и ефективно да ги користиме ресурсите кои ни се на располагање, па затоа се пријавуваме на различни настани каде што можеме да добиеме грантови или ко-финансирања. Се разбира кога ќе дојде моментот на експанзија и влегување на други пазари, тогаш финансиите од банкарскиот сектор ќе бидат потребни, но во овој момент се трудиме да најдеме алтернативни начини.

Како иновативен стартап модел дали Challenger го гледате на регионалниот и глобалниот пазар и што мислите за конкуренцијата?

Challenger е дефинитивно модел кој лесно се реплицира, и нашата првенствена замисла е Challenger да биде препознатлива алатка на Балканскиот пазар, со цел да ја развиеме Challenger и во другите Европски држави. За наша среќа на регионалниот пазар не постојат слични апликации како нашата, па конкуренцијата е занемарлива. Но, гледајќи го европскиот и глобален пазар, има апликации кои се веќе етаблирани и функционираат одлично во одредени држави, така да конкуренцијата таму е прилично силна. Се разбира, многу е рано да зборуваме за влегување на европски и светски пазари, додека не ја етаблираме Challenger на домашниот, па потоа и на регионалниот пазар. Затоа сакаме да ги имплементираме нашите планови чекор по чекор, и да оставиме пазарот и времето да ни покажат во која насока треба да се развиваме.

Продолжи со читање

Популарно