Германија привремено ја стопираше финансиската помош за одредени компании кои се соочуваат со проблеми поради рестриктивните мерки за сузбивање на ширењето на коронавирусот, откако беа откриени неколку случаи на измама, објави Министерството за економија.

Суспензијата ги опфаќа компаниите кои побарале специјална државна помош за ноември и декември, како и одредени специјални кредити.

Во соопштението се наведува дека суспензијата е воведена на 5-ти март, но не е наведено колку компании се опфатени. Во соопштението се посочува дека сомнителните случаи ќе бидат предадени на обвинителството, кое ќе покрене истрага за неправилности.

Министерството не соопшти за колкава сума пари станува збор, но германскиот портал „Business Insider“ навел дека станува збор за неколку милиони евра.

Германија започна со пакет помош без преседан со цел да им помогне на компаниите, самовработените и другите субјекти полесно да ја надминат корона криза.