Најголемата банка во Европа, британската „HSBC“, објави дека планира да отпушти 35.000 работници во најголемиот план за реорганизација под водство на Марк Такер, за да се направи заштеда од 7,3 милијарди долари. Исто така, во соопштението банката објави дека нејзиниот профит во 2019 година опаднал за 33 проценти.

Во соопштението на „HSBC“ се вели дека целта е да се намалат оперативните трошоци за 4,5 милијарди американски долари (3,5 милијарди фунти) до 2022 година, како дел од најголемото реструктуирање на банките и да се намалат средствата за 100 милијарди долари, објави „ВВС“.

„Делови од нашето работење не даваат прифатливи приноси, затоа работиме на нов план за зголемување на приносите за инвеститорите“, изјави привремениот главен извршен директор Ноел Квин, кој воедно е директор на „HSBC Holdings“.

„HSBC“ во моментов работи во повеќе од 50 земји низ Северна Америка, Европа, Блискиот исток и Азија. Во седиштето во Велика Британија се вработени повеќе од 40.000 луѓе.

Планираното намалување на оперативните трошоци ќе доведе до намалување на бројот на вработени за 15 проценти, односно пад од 235.000 на 200.000 работници. Најавеното отпуштање на 35.000 работници е многу повисоко од очекувањата, бидејќи аналитичарите предвидуваа дека „HSBC“ ќе намали околу 10.000 работни места.

Овие ригорозни мерки треба да ги потикнат инвестициите во Азија, од каде што банката има најголем дел од од своите приходи, дури и кога постојат ризици поради протестите во Хонг Конг и епидемијата на коронавирусот. Банката објави дека нејзината годишна добивка пред оданочување била 13,35 милијарди американски долари (10,3 милијарди фунти).

Освежената стратегија е клучна за Марк Такер кога е во прашање трансформација на британската банка „HSBC“.

Банката предупреди дека епидемијата на коронавирусот и економското нарушување во Хонг Конг ќе влијаат на нејзините перформанси и во 2020 година.

Акциите на „HSBC“ паднаа за дури 3,2 проценти по суспендирањето на откупот на акции за 2020 и 2021 година, кога ќе се случи најголемиот дел од обновата.

Аналитичарите предвидуваат дека „HSBC“ ќе објави прилагодена добивка од 21,8 милијарди долари.