Меѓународниот монетарен фонд (ММФ) ја намали својата прогноза за глобален раст бидејќи глобалната економија ќе расте побавно поради војната во Украина и постојано високата инфлација, што може да ја турне светската економија на работ на рецесија.

Во својата прогноза, ММФ очекува глобален раст од 3,2 проценти оваа година, 0,4 процентни поени помалку од очекуваното во април.

За еврозоната, ММФ очекува растот да биде за 0,2 процентни поени помал од прогнозите во април, на 2,6 проценти.

„Војната во Украина може да доведе до ненадејно запирање на европскиот увоз на гас од Русија; инфлацијата би можело да биде потешко да се намали отколку што се очекуваше ако пазарите на трудот се позатегнати од очекуваното или ако инфлациските очекувања не се зацврстат”, се вели во извештајот на ММФ.

Годинава ММФ очекува стапка на инфлација од 6,6 проценти во индустријализираните земји и 9,5 проценти на пазарите во развој, што се нагорни ревизии од 0,9 и 0,8 процентни поени.

Во САД растот на економијата е ревидиран на 2,3 проценти поради понискиот раст на почетокот на оваа година, намалената куповна моќ на домаќинствата и построгата монетарна политика.

Во Кина, повторното зголемување на бројот на заразени со Ковид-19 и карантините, како и понатамошната ескалација на кризата во секторот за недвижнини може дополнително да го потиснат растот на земјата, ревидиран за 1,1 процентен поен на 3,3 проценти, со големи глобални прелевања.