Министерката за финансии, Нина Ангеловска предвидува сериозен пад од 15 проценти на бруто-домашниот производ на земјата во вториот квартал од годинава. Според Ангеловска, пикот од корона кризата се очекува токму овој квартал, кога ефектите ќе се почувствуваат најсилно.

Таа на вчерашната прес конференција рече дека Министерството за финансии направило прогноза за економската активност и се очекува првиот квартал да биде позитивен, иако корона кризата тогаш веќе стигна во Македонија и ја стресе економијата уште во март. Според податоците, првите два месеца од годината биле солидни, вели министерката и затоа очекува позитивни економски резултати во првиот квартал.

Вториот квартал ќе биде најтежок за македонската економија, но се очекува во наредните месеци економијата пополека да закрепнува и да се стабилизира.

ММФ проектираше пад на БДП во земјава од 4 проценти, додека Светска банка прогнозира намалување на економската активност во земјава за 0,4 проценти.

„Предвидуваме во вториот квартал најголема контракција на економијата со износ од околу 15%. Понатаму веќе одредено подобрување, благо опоравување во третиот квартал и позитивен раст во четвртиот квартал. Оваа криза никако не може да се споредува по нејзината природа, на пример, со глобалната финансиска криза од пред една деката, па од тука можеби е и добра веста што се очекува многу побрзо би можело да се случи обновувањето, па затоа и проекциите се за раст во 2021 година.“ – изјави Нина Ангеловска, министерка за финансии.