Жените во ЕУ сè уште заработуваат помалку од мажите во просек, а за секое евро кое ќе го заработи маж, жената заработува 86 евроценти, соопштено е пред Европскиот ден на еднакви плати, кој годинава се одбележува на 10 ноември.

„Еднаквоста е една од основните вредности на ЕУ и е основа на независноста и слободата на луѓето. Жените и мажите заслужуваат еднаква плата, третман и можности”, се наведува во заедничкото соопштение на Вера Јурова, потпретседателка на Европската комисија, задолжена за вредности и транспарентност, комесарот за социјални прашања Николас Шмит и комесарката за еднаквост Хелена Дали.

Комесарите изјавија дека, иако исти плати за жените и за мажите беа предвидени со Договорите на ЕУ пред повеќе од 60 години, разликите сè уште постојат и покрај подобрувањето на положбата на жената во општеството и професионалниот живот.

Јазот во платите се должи на неколку фактори – одговорноста за грижата за семејството е претежно на жените, така што тие се со поголема веројатност да работат со скратено работно време, жените работат во послабо платени сектори и послабо платени работни места во секторот и поради помалите плати имаат и помали пензии…

Исто така, се посочува дека непостоењето на исти плати е тешко да се утврди, а нетранспарентноста на платите ги става жените и некои мажи во неповолна положба.

На почетокот на оваа година, Европската комисија предложи директива за транспарентност на платите, која има за цел да ги зајакне работниците со конкретни алатки за остварување на нивните права и што е најважно, да ја унапреди примената на еднакви плати во компаниите.

Комесарите во денешното заедничко соопштение посочија дека денешните вработени и млади луѓе, како и идната работна сила, очекуваат повеќе од работодавачите во однос на вклученоста и правичноста.