Македонски државјани потрошиле во странство 103,9 милиони евра со своите платежни картички, покажува статистиката на Народната банка.

Сумата е за првото полугодие од оваа година, односно од јануари до јуни и во неа влегуваат сите транскации со наши картички надвор, без оглед дали се повлечени на банкомат, или со нив имателите пазареле во маркети и продавници. Во истиот период, во Македонија пак, со странски картички реализирани се трансакции вредни 124,3 милиони евра.

Податоците кои ги анализиравме покажуваат дека најголем дел од парите кои сме ги потрошиле надвор се од трансакции на пос терминали што укажува на тоа дека со наши картички граѓаните надвор најмногу пазареле во маркети, бутици, продавници. Или на пос терминали во странство, во првите шест месеци сме потрошиле 57,2 милиони евра. Во истиот период како готовина на тамошни банкомати сме извадиле вкупно 11,9 милиони евра. Преку интернет пак, во странски продавници за шест месеци годинава сме потрошиле безмалку 40 милиони евра. Во оваа усма влегуваат сите нарачки на Али експрес и сличните страници на кои најчесто пазариме.

Малку поразлична е ситуацијата кога станува збор за странци кои со картички пазареле во наши продавници. Имено статистиката покажува дека во шесте месеци годинава од странски картички повеќе е повлечен кеш, на сметка на пазарувањето по продавници или сумата која поминала на пос терминали. Така, како готовина странци извадиле од македонски банкомати 73,9 милиони евра, додека испазариле во наши продавници за 49 милиони евра. Сумата која е потрошена во продавници кои нудат производи на интернет од странски картички изнесува 1,4 милиони евра.