Според сознанија на порталот Банкарство.мк, деновиве во менувачниците и банките има зголемена побарувачка за странски валути, пред се за долари и британски фунти, а тоа може да се забележи и од зголемувањето на официјалниот среден курс на овие валути.

Од Народната банка со денови уверуваат дека стабилноста на денарот не е, ниту пак ќе биде доведена во прашање, уверувајќи дека НБРСМ располага со широк инструментариум за одбрана на стабилноста на денарот, од кој најважни се високото и стабилно ниво на девизни резерви.

„Причина за паника од девалвација на денарот, навистина нема. Ние располагаме со доволно ниво на девизни резерви за да го одбраниме курсот на денарот, како што тоа го правиме низ сите овие години наназад и како што и досега сме успеале успешно да ја одбраниме неговата вредност“, изјави вицегувернерката Нацевска.

Од Народната банка потенцираат дека граѓаните не треба да се грижат, ниту непотребно да паничат и без потреба да подигнуваат депозити од банките каде што средствата се најсигурни. Сепак, посочуваат дека секогаш ќе постои мала група на депоненти, кои при било какви кризни сигнали реагираат, но набргу по согледување на состојбите – дека макроекономската стабилност е тука и дека курсот е стабилен, ги враќаат средствата во банкарскиот сектор.

„Деновиве се чувствува зголемената побарувачка за странски валути, пред се американските долари кои во изминатиов период ја зголемија својата вредност во однос на останатите светски валути. Зголемена е побарувачката и за британските фунти, како и за единствената европска валута – еврата”, велат од една позната скопска менувачница, притоа додавајќи: „Евра имаме на залиха и можеме да ги задоволиме побарувањата, но речиси и да немаме залиха на долари и фунти. И таа мала количина што ја имаме, веднаш се продава”.

По овие сознанија, се поставува прашањето дали да се слушаат надлежните и да не се подигнуваат непотребно парите од банките или луѓето да се водат по теоријата каде што има чад има и оган, па да се побрза кон најблиската менувачница или банка во потрага по странски валути!?

Нашиот совет е дека нема простор за паника, дека не треба панично да се подигнуваат депозитите од банките, ниту пак непотребно да се разменуваат македонските денари во странски валути. Потребно е да се слушаат надлежните органи, кои најдобро ја знаат состојбата во државата. Оние кои постапуваат спротивно на овие укажувања многу често доаѓале во ситуација да ги изгубат каматите од банките, па дури и да имаат помала количина на паричен капитал, губејќи на курсни разлики од префрлувањето од една во друга валута.