Настанот за одбележување 30 години независност на Северна Македонија кој се одржа на 8ми септември пред Собранието на Република Северна Македонија го отслика историскиот референдум на 8 септември 1991.

Еден од настаните кој остави посебен впечаток беше визуелниот – мултимедијален перформанс, видео мапинг на фасадата на зграда на Собранието на Република Северна Македонија во Скопје.

Проекцијата на видео анимација ја претстави македонската традиција и традициите на другите заедници, современото живеење со кое се креира уникатна дигитална транспозиција на минатото во иднината преку деликатно комбинирање на одбрани дела кои го одразуваат мултикултурниот карактер на општеството, мозаикот на различности и интеркултурниот дијалог изразен преку културата, традицијата, уметноста и нивна преобразба преку шпекулативен дизајн кој ги понесе гледачите во една светла, оптимистична иднина која ветува прогрес и стабилност.

Видео анимацијата ги прикажа клучните европски вредности: негата на индивидуалниот и колективниот идентитет, мултикултуралноста, грижата за различностите и интеркултурниот дијалог преку избор на бои, слики и музика кои ќе одразуваат заедниците кои живеат во РСМ.

Визуелните артисти/уметници кои ја сработија оваа видео анимација – мапинг „Поглед во иднината“ се Емил Петров, Петар Џон и Глигор Постоловски, во координација со маркетинг агенцијата ИН маркетинг.

Галерија: