Од почетокот на 2021 година, повеќе од 46.000 луѓе пријавиле дека изгубиле повеќе од 1 милијарда долари во измама со криптовалути, се наведува во новиот извештај на американската Федерална трговска комисија на САД (FTC), пренесува „Reuters“.

Скоро половина од луѓето кои пријавиле загуби на дигитални валути велат дека измамата започнала со рекламирање, објавување или известување на социјалните мрежи, според експертите на комисијата.

Лудилото за криптовалути беше во полн ек минатата година, кога цената на биткоинот достигна рекордно високо ниво од 69.000 долари во ноември.

Во извештајот се наведуваат социјалните мрежи и криптовалутите како главна комбинација за измама. Според агенцијата, околу 575 милиони долари од сите загуби поврзани со измама со криптовалути се поврзани со лажни можности за инвестирање.

Скоро четири од секои десет долари изгубени во измама на социјалните мрежи биле поврзани со криптовалути – многу повеќе од кој било друг начин на плаќање. „Instagram“, „Facebook“, „WhatsApp“ и „Telegram“ се водечките платформи што ги користат сајбер-криминалците.

Просечната пријавена загуба за поединец е 2.600 долари, а биткоинот, тетерот и етерот се криптовалутите што луѓето најчесто ги користат за да им платат на измамниците.

Пријавените загуби во 2021 година беа речиси 60 пати повисоки од оние пријавени во 2018 година. Според FTC, бидејќи крипто средствата не се централизирани во банка, не постои субјект што ќе пријави измама или сомнителна активност, а трансакциите не можат да се вратат.

FTC сподели неколку совети за да им помогне на луѓето да избегнат идни измами, вклучително и избегнување гарантиран профит и високи приноси: „Ниту една инвестиција во криптовалути не гарантира заработка, особено не голема заработка“.