Цената на биткоинот повторно се намали откако во изминатите 24 часа го достигна највисокото ниво од средината на јуни, поради оптимизмот дека инфлацијата полека се намалува.

Биткоинот достигна највисока вредност во последните 30 дена и се тргуваше по цена од 25.135 американски долари, пред да ја намали својата вредност. Во моментов тој се тргува по цена од 24.118 американски долари, според „Coinmarketcap“.

Биткоинот е децентрализиран криптовалутен систем базиран на блокчејн технологија што може да биде „ископан“ од секој корисник што учествува во системот. Ова бара создавање на нови блокови во системот.

Концептот на системот беше објавен во ноември 2008 година од неговиот автор (веројатно тим на автори) под псевдонимот Сатоши Накамото.

Втората најпозната криптовалута, Етериумот ја намали својата вредност за 4,21% и во моментов се тргува по цена од 1.911 долари, откако во изминативе 24 часа го достигна месечниот максимум пробивајќи ја границата од 2.000 долари, при што се тргуваше по цена од 2.022 американски долари. За минатиот месец, неговото зголемување беше околу високи 70% – најдобро од јануари 2021 година.

Иако, изминатиов период криптовалутите генерално бележат раст, сепак тие се далеку од максималното ниво кое го достигнаа во ноември претходната година.