Со украдени милијарди долари од банки, единиците за сајбер-војна на кореанската армија се многу подиректна и поитна закана отколку нејзината забранета нуклеарна програма.

Додека Северна Кореја е заглавена во 1950-те, благодарејќи на сите можни санкции што некогаш им текнало на САД да ги воведат, таа истовремено тивко но крајно успешно успева да ги изгради своите сајбер капацитети, кои според аналитичарите денес бројат илјадници многу добро обучени хакери.

Светската јавност прв пат стана свесна за сајбер капацитетите на Северна Кореја во 2014, кога нејзините хакери, наводно, успеаа да упаднат во мрежата на филмското студио на Сони, како одмазда за филмот „The Interview“, во кој се исмеваше лидерот на земјата. Нападот резултираше со предвремено објавување на неколку нови филмови на интернет, како и обемна база на доверливи документи од компанијата.

Од тогаш Северна Кореја е обвинета за повеќе сајбер-напади, од грабежот на 81 милион долари од Централната банка на Бангладеш, до Вона Крај рансомвер нападот од 2017 со кој беа заразени околу 300.000 компјутери во 150 држави.

Во февруари САД обвини тројца Севернокорејци за обид да кражба на над 1,3 милијарди долари од американски финансиски институции.

Во Годишниот извештај за процена на заканите за 2021, Вашингтон признава дека Пјонгјанг „веројатно поседува експертиза за предизвикување привремени, ограничени нарушувања на работата на некои мрежи критични за американската инфраструктура“.

Во документ од канцеларијата на директорот за национална безбедност на САД се наведува дека Пјонгјанг има украдено стотици милиони долари од финансиски институции и берзи за криптовалути,.

Кон средината на 1990-те, тогашниот господар на Северот, Ким Јонг Ил, изјави „сите војни на иднината ќе бидат компјутерски“. Отприлика од тоа време потекнува и сајбер програмата на земјата.

Единицата за сајбер-војна на Северна Кореја, Биро 121, брои околу 6.000 лица, и оперира од неколку држави вклучувајќи ги Белорусија, Кина, Индија, Малезија и Русија. Разликата меѓу оваа и другите хакерски единици на армиите низ светот, е што Северна Кореја ги ангажира своите хакери и за чисто финансиски ќар.

Припадниците на Биро 121 се обучени за најразлични програмски јазици и оперативни системи во севернокорејскиот Мирим Универзитет. За оваа обука годишно се регрутираат 100 од најдобрите ученици на Северна Кореја.

Извор: off.net.mk