Коста Костовски поднесе оставка и повеќе нема да биде дел од Одборот на директори на Македонска берза и на Централниот депозитар за хартии од вредност.

Претходно, Коста Костовски ја извршуваше функцијата и претседател на Одборот на директори на Македонска берза, но од јуни годинава функцијата ја презема Тони Стојановски, кој е дел од Управниот одбор на Стопанска банка АД – Скопје, а воедно е и генерален директор за корпоративно банкарство.

По неодамнешните случувања поврзани со Еуростандард банка АД Скопје, Коста Костовски одлучи да поднесе оставка и повеќе да не биде неизвршен член на Одборот на директори на Македонска берза, ниту член на Одборот на директори на Централниот депозитар за хартии од вредност.

„Согласно член 166-б од Законот за хартии од вредност, известуваме дека е поднесена оставка од страна на г-динот Коста Костовски од функцијата неизвршен член на Одборот на директори на Берзата и е направен упис на оваа промена во тековната состојба на Берзата, којашто се води во Централниот регистар на РСМ.”, се вели во соопштението на Македонска берза.

Известување за оставаката на Костовски има и од Централниот депозитар за хартии од вредност.

„Согласно член 166-б став 1 алинеја 4 и став 2 од Законот за хартии од вредност, Ве известуваме дека е поднесена оставка на лицето Коста Костовски на местото неизвршен член на Одборот на директори на Централен депозитар за хартии од вредност АД Скопје. Оставката до Депозитарот е поднесена на ден 20.08.2020 година и врз основа на истата извршен е соодветен упис во Трговскиот регистар.”, се вели во соопштението на Централниот депозитар за хартии од вредност.