Дека пандемијата со коронавирусот е сериозна, а кризата што ни претстои ќе биде една од најтешките за глобалната економија, а која веќе се чувствува и кај најголемите светски корпорации.

Најголемите светски компании веќе почнаа драстично да ги намалуваат буџетите за тековната година, да ги намалуваат очекуваните резултати и приходи, па дури и да затвораат подружници и филијали и да го кратат бројот на вработени.

Во редот на најголемите светски гиганти секако спаѓа и технолошкиот гигант „Google” кој планира да ги намали своите маркетинг буџети за дури 50 проценти, според внатрешните документи, до кои дошла телевизиската мрежа „CNBC”.

На директорите им било посочено да замрзнат дел од работните места за вработените со полно работно време и на тие со договор. Ова кратење е драстичен чекор од она што првично го најави пред една недела извршниот директор, Сундар Пичаи.

„Намалување на буџетите и замрзнувањето на работните места се случува насекаде во светот на маркетингот, па ниту ние не сме исклучок“, напиша еден од директорите, при што додаде: „Од нас, заедно со остатокот од маркетинг секторот е побарано да го скратиме буџетот за 50 проценти во втората половина на годината“.

Портпаролот на „Google” потврди дека буџетите во некои сектори се намалени за дури 50 проценти, но додаде дека нема намалување во другите сектори и дека ова сè уште е во процес на оценување.