Во периодот од 1.1.2021 до 31.12.2021 година, НЛБ Банка АД Скопје работеше согласно усвоената Деловна политика на Банката за 2021-та година, прилагодувајќи го работењето на изменетите пазарни услови поради пролонгираната пандемија од КОВИД-19, која донесе бројни ограничувања во домашната и меѓународната економија.

Во текот на 2021 година, НЛБ Банка АД Скопје оствари позитивни резултати преку реализација на низа активности поврзани со зголемување и подобрување на понудата за клиентите со продукти и платни сервиси. Во анализираниот период, Банката продолжи со имплементација на стратешките иницијативи во инвестиции во дигитализација и нови технологии, со цел пренасочување на клиентите кон дигиталните канали како поедноставни, поевтини и побезбедни начини на извршување на банкарските трансакции.

Заклучно со 31.12.2021 година билансната сума изнесува 107.709.479 илјади МКД, односно се зголеми за 11.164.266 илјади МКД или 11,6% во однос на 31.12.2020 година. Вкупните депозити (депозити на комитенти и депозити на банки) изнесуваат 86.589.168 илјади МКД и во однос на 31.12.2020 година се зголемени за 6.809.329 илјади МКД или за 8,5%, стои во анализата на финансискиот резултат на НЛБ Банка АД Скопје објавен на Македонска берза.

„Зголемувањето на депозитите се должи на нови клиенти од сегментот домаќинства кои се приматели на пензии, плата и други видови примања, нови клиенти кои ги користат физичките и електронските платни сервиси на Банката и нови клиенти од сегментот нефинансиски правни лица, како и на зголемувањето на приливот на средства на сметките на постојните клиенти во домашна и странска валута.”, велат од НЛБ Банка.