Берзански индекс претставува алатка за мерење на промените на цените на група хартии од вредност.

Македонскиот берзански индекс (МБИ10) претставува агрегатен показател на движењето на цените на акциите кои котираат на Македонска берза АД Скопје.

Во берзанската „кошница“ односно во МБИ10 индексот влегуваат акциите на најквалитетните компании, коишто мора да бидат репрезентативен примерок и да дадат јасна слика за движењата на пазарот на капитал.

МБИ10 се состои од најмногу 10 котирани акции на Официјалниот пазар на Македонската Берза, избрани од страна на Комисијата за берзански индекс, според критериумите наведени во Методологијата. Комисијата за берзански индекс, редовно (два пати годишно) и вонредно (во случај на вонредни околности) врши усогласување на структурата на МБИ10 со состојбата на пазарот.

На 15.12.2020 година Комисијата за берзански индекс изврши редовна ревизија на индексот МБИ10.

Согласно Методологијата за пресметување на индексот МБИ10, Комисијата за берзански индекс по последната извршена редовна ревизија определи дека елементи на индексот МБИ10 ќе бидат обичните акции издадени од:

1. Комерцијална банка АД Скопје;
2. Гранит АД Скопје;
3. Алкалоид АД Скопје;
4. Макпетрол АД Скопје;
5. Македонијатурист АД Скопје;
6. Стопанска банка АД Битола;
7. Македонски Телеком АД Скопје;
8. НЛБ Банка АД Скопје;
9. Стопанска банка АД Скопје и
10. ТТК Банка АД Скопје.