Виза и Мастеркард соопштија дека ги прекинуваат нивните активности во Русија. Се очекува ова да биде еден од најсилните удари врз руските граѓани, во нивното секојдневно функционираање и да биде една од најтешките економски санкции врз земјата.

Но, Русија очигледно подолго време се подготвувала за оваа можност, бидејќи руските банки објавија дека имаат разработено свои, домашни форми на електронско банкарство. Банката „Сбербанк” најави дека ќе ги замени картичките „Visa” и „Mastercard” со системот МИР, кој го има развиено во соработка со кинеската „UnionPay”.

„UnionPay” веќе неколку години ги има надминато „Visa” и „Mastercard” по обемот на трансакции кои ги врши, со картички или во електронско банкарство. Но, компaнијата досега скоро и да не работела надвор од Кина и ќе се соочи сериозен тест дали може преку ноќ да го покрие и рускиот пазар.

Русија веќе се обидува загубените пазари во Европа и САД да ги замени со поголема трговска размена со Кина, Пакистан, Иран и Индија, во надеж дека ќе биде дел од голем, нов економски блок на Евроазија.