Според податоци од извештајот за финансиска стабилност кој го објавува Народната банка во 2016 година, во земјава во корпоративниот сектор се потребни 116 дена за наплата на побарувањата. Ако станува збор за извозно ориентираните компании рокот е 79 дена.

Податоци пак за наплатата на долговите меѓу фирми во развиените земји покажуваат дека таму рокот е значајно понизок. Така, во Германија за наплата се чека по 25 дена во просек, во Шведска по 30 дена, во Австрија 34 дена, во Франција 42 дена во просек. Во соседна Грција тој просечен рок е околу 60 дена, додека во Италија е 85 дена.

Иако законскиот рок за плаќање во Македонија е 60 дена, компаниите често го пролонгираат плаќањето.

Законот за финансиската дисциплина подразбира приватните субјекти со договори да се обврзат да си ги платат меѓусебните обврски во рок од 60 дена или да се договорат меѓусебно да го сторат тоа за максимум 120 дена. Во договорите меѓу јавните претпријатија и приватните фирми рокот не смее да е подолг од 60 дена. Почетниот износ за одмерување на глобите изнесува 10.000 евра за економски оператор од приватниот сектор- трговско друштво, трговец поединец и правно лице кое врши профитна дејност и е регистрирано согласно закон доколку не ја исполни паричната обврска во законски утврдените рокови.

Ако земеме во обзир дека секоја фирма чека да наплати за своите производи и услуги, минимум дупло подолго од законски одреденото, фирмите имаат сериозен проблем со ликвидноста. Ова може да влијае и на исплатата на плати на вработените и задолжувања према банките за одржување на нормални финансиски текови на фирмата.

Во суштина, секоја фирма во Македонија му должи на некого пари и се задолжува (најчесто со кредити во банка) за да ги покрие обврските.