Компаниите што се пазарно ориентирани, а кои се од областа на индустријата, градежништвото, трговијата и останатите услужни дејности, во 2017 година реализирале 6,4% поголем промет и 4,8% зголемена додадена вредност во однос на претходната година, објави вчера Државниот завод за статистика.

Според податоците, имало 55.203 вакви компании и тие оствариле вкупен промет од 19,4 милијарди евра и додадена вредност од 4,3 милијарди евра. За ангажираните 385.728 вработени биле издвоени 2 милијарди евра.

Најголем промет е реализиран од секторот Трговија на големо и мало (41.6%), а по него следат секторот Преработувачка индустрија (26.9%), Градежништво (7.2%), Снабдување со електрична енергија, гас, пареа и климатизација (7.0%) и секторот Транспорт и складирање со 5.9%.

Во однос на големината на претпријатијата доминираат микро претпријатијата со помалку од 10 вработени (90.0 %), речиси половината од нив од областа на трговијата. Со ангажирани 31.9 % од вкупно вработените, создале 20.8 % од вкупната додадена вредност. Од друга страна, големите претпријатија со учество од само 0.3 %, но со ангажирани 25.2 % од вработените, создаваат најголема додадена вредност (36.3 %) во рамките на деловниот сектор, и тоа главно во секторот Преработувачка индустрија (13.7 %).