Растот на вредноста на технолошкиот гигант „Apple” му донесе на инвестицискиот гуру Ворен Бафет, американски инвеститор и претседател на Беркшир Хатавеј, заработка од над 120 милијарди долари.

Претходната недела акциите на „Apple” пораснаа, при што компанијата надмина пазарна капитализација од три трилиони (илјада милијарди) долари.

Компанијата на Бафет почна да ги купува акциите на „Apple” во 2016 година, а до средината на 2018 година се здоби со пет проценти од акциите на производителот на iPhone, во вредност од 36 милијарди долари. Вредноста на уделот на Беркшир во „Apple” вртоглаво порасна до 2022 година и сега изнесува 160 милијарди долари бидејќи силниот раст на цената на акциите на технолошкиот гигант продолжува и во новата година.

„Без сомнение, ова е една од најуспешните инвестиции што Беркшир ги направи во последната деценија“, изјави за „CNBC”, Џејмс Шанахан, аналитичар во Едвард Џонс.

Покрај заработката од огромниот скок на цената на акциите на „Apple”, оваа инвестиција беше профитабилна за Беркшир и поради големите дивиденди кои редовно ги добиваше во износ од околу 775 милиони долари годишно, во просек.

Уделот на Беркшир во „Apple” сега сочинува повеќе од 40 отсто од капиталното портфолио на конгломератот на Бафет, според „InsiderScore”. Беркшир Хатавеј е најголемиот акционер на „Apple”, надвор од индексната кошничка на добавувачи и средства со кои се тргува на берзата.