Најпознатата дигитална валута биткоин го надмина прагот од 40.000 долари, објави „Associated press“.

Најпопуларната и најстара криптовалута најпрво на 16-ти декември претходната година го проби прагот од 20.000 долари, па десет дена подоцна надмина вредност од над 25.000 долари, а на самиот старт на новата 2021 година, поточно на 2 јануари достигна вредност од 30.000 долари.

Но, тука не застана, па биткоинот само по една недела ја надмина и границата од неверојатни 40.000 долари.

Зголемената побарувачка од институционалните и корпоративните инвеститори, а од неодамна и од малопродажните инвеститори, енормно го поттикнува растот на цените на криптовалутите, а пред се на биткоинот. Инвеститорите ги привлекуваат изгледите за брз профит во светот на ултра-ниски приноси на хартии од вредност и негативни каматни стапки на централните банки, пренесува „БТА”.

За некои, биткоинот е „осигурување“ против инфлацијата во услови на огромен паричен стимул насочен кон ублажување на економските ефекти од пандемијата на коронавирусот.

Криптовалутите со помал удел на пазарот, како етериум и Екс Ар Пи (XRP), пораснаа за 1,8 проценти. Вообичаено нивниот курс оди паралелно со тој на биткоинот.