Според податоците на Националното биро за статистика на Словенија (Сурс) обемот на бруто домашниот производ на Словенија во вториот квартал од годинава се зголеми за 8,2 проценти на годишна основа.

За високиот пораст во услови на криза кога речиси сите моќни европски и светски економии се пред колапс, придонесе домашната и странската побарувачка. За растот на домашната потрошувачка во тој период најповолно влијаела потрошувачката на домаќинствата, додека девизната размена на услуги.

Во вториот квартал домашната потрошувачка е зголемена за 8 проценти во однос на истиот период од претходната година. За ова најмногу придонесе потрошувачката на домаќинствата, која е зголемена за 10,6 отсто.

Извозот порасна повеќе од увозот – извозот за 8,7 проценти, а увозот за 8,5 проценти. Придонесот на надворешнотрговскиот суфицит во растот на БДП овојпат беше позитивен за 0,6 процентни поени.

Во однос на истиот период од претходната година, додадената вредност е зголемена за 8,7 отсто. Трет квартал по ред, најголем придонес во растот на додадената вредност имаа трговијата, транспортот и угостителството, кои и покрај забавувањето забележаа раст од 20,8 отсто на годишно ниво. Кај информациско-комуникациските дејности растот на годишно ниво е 13,7 отсто, а кај стручните, научните, техничките и другите разновидни деловни дејности 12,4 отсто. Растот на додадената вредност во преработувачките дејности забави петти квартал по ред, но сепак остана позитивен на годишно ниво и изнесува 2,7 отсто.

Во тој период во Словенија биле вработени 1.080.000 лица, што е за околу 36.000 или 3,4 проценти повеќе во однос на истиот квартал од 2021 година. Најголем дел од новите вработувања се во градежништвото, производството и стручните, научни и технички дејности.

Според сезонски приспособените податоци користени за споредби во ЕУ, економскиот раст во вториот квартал изнесувал 8,3% на годишна основа или 0,9% на квартална основа.

Економските движења се во согласност со очекувањата од јунската прогноза, покажуваат најновите податоци на Банката на Словенија. Истовремено, тие посочуваат дека со продолжувањето на руската воена агресија, изгледите се сè понеизвесни, а очекувањата за економски раст во следната година се намалуваат.

Засега, економскиот раст во Словенија останува поповолен од просекот на еврозоната, каде кварталниот раст на БДП, според првите проценки, изнесува 0,7 отсто (0,9 отсто во Словенија), а четири проценти на годишна основа.