Европската централна банка објави дека е подготвена да ја поддржи ликвидноста во Еврозоната сè додека не биде сигурна дека корона кризата е завршена, а Кристин Лагард им порача на владите дека мора да помогнат и да дадат поддршка за закрепнувањето на економијата.

Економската активност во Еврозоната се стабилизираше во последните неколку недели благодарение на олеснувањето на рестриктивните мерки за карантин и движење на населението, но неизвесноста околу брзината и обемот на закрепнувањето и понатаму останува огромна, изјави Лагард на онлајн конференција по редовната седница на ЕЦБ.

Управниот одбор на ЕЦБ ги задржа клучните каматни стапки на сегашното ниво, вклучително и каматната стапка за главни операции на рефинансирање од нула проценти и негативната каматна стапка на депозитите од 0,5 проценти.

На претходната седница, ЕЦБ ја зајакна својата поддршка за европската економија во корона кризата, зголемувајќи ја ликвидноста преку удвојување на вредноста на специјалната програма за откуп на обврзници (PEPP), на 1.350 милијарди евра.

Лагард изјави дека до крајот на јуни, Европската централна банка купила обврзници за повеќе од 360 милијарди евра.

„Програмата „PEPP” е ефикасна, соодветна и функционална. Ние не разгледавме никакви промени во однос на таа програма“, изјави Лагард на онлајн конференцијата.

Осврнувајќи ја инфлацијата, Лагард рече дека основната инфлација е намалена заради пониските цени на енергенсите. „Притисокот врз цените треба да остане многу пригушен заради големиот пад на БДП и придружните поизразени слабости во економијата“, додаде таа.

„ЕЦБ воведе итни вонредни мерки за ублажување на економската штета предизвикана од пандемијата на коронавирусот, но владите мора да помогнат со дополнителни фискални мерки“, истакна шефицата на ЕЦБ.

Лагард се осврна и на предлогот на Европската комисија за фондот вреден 750 милијарди евра за закрепнување на ЕУ од корона кризата.

„Важно е европските лидери брзо да постигнат договор за овој амбициозен пакет за закрепнување на економијата“, рече Лагард.