Турскиот претседател Реџеп Таип Ердоган го отпушти гувернерот на централната банка на Турција поради високата инфлација и рекордно ниската вредност на лирата.

Поранешниот министер за финансии Наџи Агбал ќе го замени досегашниот гувернер Мурат Ујсал, согласно уредбата со законска сила на претседателот објавена во Службен весник.

Одлуката е донесена откако лирата изгуби скоро една третина од својата вредност од почетокот на годинава – во петокот достигна рекордни 8,58 во однос на американскиот долар, а годишната инфлација беше енормни 11,89 проценти.

Ујсал беше назначен за претседател на централната банка во јули 2019 година, откако неговиот претходник не успеа да ги намали каматните стапки за да ја зајакне економијата.

Ердоган повика на пониски каматни стапки, негирајќи ја воспоставената економска теорија дека високите стапки можат да ја намалат инфлацијата. Тој смета дека како што паѓаат каматните стапки, така ќе се намалува и инфлацијата.

Минатиот викенд тој ги опиша каматните стапки, курсот и инфлацијата како „ѓаволски триаголник“.

Ердоган и турскиот министер за финансии, неговиот зет Берат Албаирак, честопати ги обвинуваат странските сили за економските проблеми на Турција.

Агбал беше назначен од претходната позиција како шеф на претседателскиот директорат за стратегија и буџет. Тој беше министер за финансии од 2015 до 2018 година.

Неговата нова улога доаѓа во моментот кога Турција стравува од влошување на односите со САД доколку кандидатот на демократите Џо Бајден ја официјализира победата на претседателските избори.