Акциите на европските берзи од утринава бележат пад, втор ден по ред, додека траат руските напади врз градовите низ Украина.

Индексот „STOXX 600″ на водечките европски акции беше намален за 0,8 проценти денеска во 9:30 часот, откако во текот на вчерашниот ден се намали за околу 2 проценти.

Утринава лондонскиот „FTSE” индекс се намали за 0,57% на 7.197 поени, додека франкфуртски „DAX” се намаи за 1,44 проценти на 13.500 поени, а париски „CAC” за 1,60% на 6.276 поени.

Цените и на азиските берзи паднаа, па „MSCI” Азиско-пацифичкиот берзански индекс, без јапонскиот, беше во минус од 1,6% околу 9:30 часот и падна на најниско ниво во последните 16 месеци.

На токиската берза индексот „Nikkei” се намали за повеќе од 2 проценти, додека цените на акциите во Австралија, Шангај, Јужна Кореја и Хонг Конг паднаа меѓу 0,6 и 2,5 отсто.

Берзите рано утринава беа под силен притисок по веста дека избувнал пожар во украинската нуклеарна централа Запорожје, најголемата во Европа, по руското гранатирање и дека е измерено покачено ниво на радиоактивност.

Пазарите подоцна делумно се смирија бидејќи украинските власти објавија дека испратиле пожарникари во електраната и дека нејзината безбедност сега е загарантирана. Според последните вести, електраната е заземена од руските воени сили.

Несигурноста на инвеститорите останува, па тие се повлекуваат од поризични инвестиции и бараат побезбедни засолништа на капитал.

Лошо на берзите влијае и вчерашниот пад на Волстрит. Индексот „Dow Jones” падна за 0,29 проценти, додека „S&P 500″ се лизна за 0,53%, а „Nasdaq” индексот за 1,56 проценти.

Рускиот напад врз Украина е во втората недела и штетите се големи и покрај двете рунди преговори за прекин на огнот.

Растот на цената на нафтата ја поттикнува инфлацијата.

Инвеститорите се загрижени и за брзиот раст на цените на нафтата, кои го достигнаа највисокото ниво во последните седум години, бидејќи со тоа може дополнително да се поттикне инфлацијата во САД, што и без тоа се движи кон највисоко ниво во последните 40 години.

Претседателот на американската ФЕД Џером Пауел во средата порача дека ќе се залагаат за зголемување на каматните стапки за 0.25 поени на состанокот во март, што ги охрабри инвеститорите. Сепак, ако инфлацијата продолжи, ФЕД ќе мораат дополнително да ја заострат монетарната политики, што пак би можело да го забави растот на економијата.