За да се обезбеди директна финансиска инјекција за домашната економија погодена од целосната парализа предизвикана од корона вирусот неопходно ќе биде задолжување на државата кај меѓународните финансиски институции, како и кај странските комерцијални банки.

Иницијативата за задолжување ја покрена дополнителната заменик министерка за финансии Гордана Димитиреска Кочоска со план за прибирање на над половина милијарда евра. Според планот предвидено е од ММФ да се задолжи државата во износ од 87 милиони евра, од Светска банка заемот да изнесува помеѓу 100 и 120 милиони евра, додека пак од странските комерцијални банки би требало да се позајмат околу 400 милиони евра.

Опозицијата нема да се противи на ваков вид на задолжување иако станува збор за непопуларна мерка која во изминатиот период беше критикувана.

„На компаниите и државата во овие кризни времиња и се потребни пари, затоа задолжувањето на Владата иако непопуларна, но е единствена опција во овој момент за да ме се помогне на стопанството. Нема да пишуваме писма до кредитобарателите за откажување на задолжувањето како што тоа го правеше СДСМ кога беше опозиција, туку ќе ја поддржиме владата во намерата да обезбеди финансиски средства за финансирање на потребите на фирмите во периодот на кризата“, напиша на социјалната мрежа Христијан Мицкоски претседателот на ВМРО-ДПМНЕ.

Доколку планот се усогласи во Министерството за финансии предложеното задолжување ќе биде ставено на дневен ред на седница на Влада која со оглед на воведената вонредна состојба ќе може да се задолжи со оваа висока сума со управна одлука. Заложбите ќе бидат кредитите и задолжувањата да бидат по поволни услови.