Задолжувањето на македонските граѓани во банките е загрижувачко гледајќи ги статистичките податоци на Народната банка во извештајот за месец октомври претходната година. Задолжувањето на граѓаните на трансакциските сметки по основ на позајмици и долгови по кредитни картички чинат приближно колку вкупната цена на автопатот Кичево Охрид.

Македонците се во минус од 217 милиони евра на своите тековни сметки. По основ на кредитни картички должат уште 378 милиони евра.

Вкупниот долг на домаќинствата во земјава изнесува близу 3 милијарди евра. Половината од долгот е по основ на потрошувачки кредити за кои банките не бараат поголеми гаранции, ниту пак прашуваат за намената на парите. Дури третина од банките изминатата 2019 година ги олесниле условите за овие кредити.

Претходната година, банките нуделе најдобри услови за станбени кредити во псоледните пет години. Но, задолжувањето по основ на станбен кредит е многу помало во споредба со потрошувачките кредити, кредитните картички и дозволеното пречекорување, пари кои ги користат граѓаните пред се за трошење, а не за инвестиции. За станбени кредити граѓаните должат 804 милиони евра и уште дополнителни 14 милиони евра за реновирање.

Податоците на Народната банка покажуваат дека Македонците најмалку бараат кредити за да купат нов автомобил. По овој основ должат само 5 милиони евра.

Прогнозите за годинава се дека кредитирањето ќе расте. Дополнителен импулс за повеќе кредити можат да дадат државните мерки за зголемување на платите што ќе ја зголеми кредитната способност на граѓаните.