Американскиот технолошки гигант „Google“ објави дека ќе инвестира повеќе од 900 милиони долари во следните пет години за да и помогне на Италија во нејзиното економско закрепнување како резултат на корона кризата.

„Google е горд што е партнер во економското закрепнување на Италија. Денес ја најавуваме „Italia in Digital“, нов план за забрзување на економското закрепнување на земјата со нудење поддршка за деловните субјекти и лицата кои бараат работа“, рече извршниот директор на „Google“, Сандер Пичаи.

Идејата е да се забрза економското закрепнување на оваа земја по пандемијата на коронавирусот со нудење алатки, обука и партнерства за деловните субјекти и луѓето кои ги загубија своите работни места.

„Google сега е посветен да им помогне на повеќе од 700.000 Италијанци, со цел до крајот на 2021 година вкупната бројка да достигне повеќе од еден милион“, се вели во соопштението на компанијата.

Италија е една од најтешко погодените земји во Европа и корона кризата најмногу влијае на угостителството, логистиката, транспортот и трговијата.

Како што покажува италијанскиот институт за статистика (ИСТАТ), кризата зафати 34% од италијанското производство.

Активностите и работењето на 2,2 милиони компании, исто така, беа суспендирани, што претставува 49% од вкупниот износ, додека 65% од целокупниот извоз беше затворен.