Советот на Народната банка на Република Северна Македонија донесе Одлука за укинување на Одлуката за привремено ограничување на распределбата и исплатата на дивиденда на акционерите на банките, објавена во Сл. весник на РСМ бр.177 од 03.08.2021 година, со која престанува да важи привременото ограничување на распределбата и исплатата на дивиденда на акционерите на банките.

Носењето на оваа Одлука имаше силно влијание и врз тргувањето на Македонска берза, па така инвеститорите побрзаа да купат акции од домашните банки кои објавија дека ќе исплатат дивиденда.

Една од најтргуваните акции секако се акциите на Комерцијална банка АД Скопје. Банката објави дека последен ден на тргување со право на дивиденда за 2020 година е 09.08.2021 година (понеделник). Датумот на евиденција, според кој се определува листата на акционери кои имаат право да добијат дивиденда за 2020 година, е 11.08.2021 година (среда).

Исплатата на дивиденда за 2020 година ќе започне на 24.08.2021 година.

По објавата на овие информации од страна на Комерцијална банка АД Скопје, инвеститорите побрзаа да купат што поголем број акции и да се стекнат со право на дивиденда, а тоа влијаеше и врз зголемување на вредноста на акциите.

Дополнително, за растот на цената на акциите на Комерцијална банка влијаеше и податокот дека Главниот извршен директор и Претседател на Управниот одбор, Хари Костов се стекна со 3.500 обични акции. Хари Костов вложи околу 34 милиони денари или некаде околу 552 илјади евра во акции на Комерцијална банка.

Овој чекор на првиот човек на Комерцијална банка е охрабрувачки сигнал за акционерите кои имаат акции во Банката, да не ги продаваат, а воедно и мотив повеќе да се охрабрат нови инвиститори да вложат во акциите на Комерцијална банка.

Акцијата на Комерцијална банка се проби над 10.000 денари и во моментов нејзината просечна цена според податоците на Македонска берза чини 10.057,91 денари и бележи раст од 1,49 проценти.

Преземањето на оваа содржина не е дозволена без согласност од Редакцијата на Банкарство.мк.